އެމްޑީޕީން ކިތަންމެ މަސައްކަތެއް ކުރިނަމަވެސް ޖެނީވާއަަށް ފޮޓޯ ފޮނުވުމުގެ ފުރްޞަތެއް ނުދޭނަން: ރައީސް

13 ޖުލައި، 2012

އަބްދުއްލަތީފް

އެމްޑީޕީ އިން މަގުތަކަށް ނުކުމެ ކިތަންމެ މަސައްކަތެއް ކުރިނަމަވެސް ޖެނީވާގައި މިހާރު ކުރިއަށްދާ އިންސާނީ ހައްޤުތަކާބެހޭ ޖަލްސާއަށް ފޮނުވަން ބޭނުންވެގެން އުޅޭ ފޮޓޯ ފޮނުވުމުގެ ފުރްޞަތު ނުދެއްވާނެކަމަށް ރައީސުލްޖުމްހުރިއްޔާ ޑރ. މުޙައްމަދު ވަހީދު ޙަސަން މަނިކު ވިދާޅުވެއްޖެއެވެ.

ރައީސް މިކަން ޙާމަކުރެއްވީ ބުދަ ދުވަހުގެ ރޭ ކ. ހުރާ އިޖްތިމާޢީ މަރުކަޒު ހުޅުއްވައިދެއްވުމަށްފަހު އެކަމަށްޓަކައި ހުރާގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.

ރައީސް ވިދާޅުވީ ރާއްޖެއިން ބޭރުން ވަޑައިގެން އުޅުއްވާ ޑިޕްލޮމެޓުންނަށް ދައްކަންޖެހޭ ވާހަކަތައް ސަރުކާރުން ދައްކަމުން ގެންދާނެ ކަމަށާއި އެކަމަށް ހުރަސް އެޅުމަކީވެސް ކުރެވޭނެ ކަމެއް ނޫން ކަމަށެވެ.

ރައީސް ވިދާޅުވީ ރާއްޖޭގެ ވެރިކަން ހިންގެވުމުގެ މަސްއޫލިއްޔަތު ހަވާލުވެވަޑައިގެން ހުންނެވީ ރައްޔިތުންނަށް ވެރިކަމުގެ ފަރާތުން ފޯރުކޮށްދޭންޖެހޭ ޚިދުމަތްތައް ޟޯރުކޮށްދިނުމުގެ މަސްއޫލިއްޔަތު އަދާކުރައްވަން ކަމަށާއި އެކަންކަން ކުރެއްވެވުމުގައި ފަސްޖެހިވަޑައިނުގަންނަވާނެ ކަމަށެވެ.

“އަޅުގަނޑު ޔަޤީންކޮށް އަރުވަން.  އަޅުގަނޑުމެން މިމަސައްކަތާ ޙަވާލުވެގެން މިއުޅެނީކީ، އެއްގޮތަކަށްވެސް މިކަމުގައި އަޅުގަނޑުމެންނަށް ފަހަތަށްޖެހުމުގެ އެއްވެސް ވިސްނުމެއް އޮވެގެނެއް ނޫން. އަޅުގަނޑުމެން މި ޤައުމުގެ ރައްޔިތުންނަށްޓަކައި ކުރަންޖެހޭ ހުރިހާ މަސައްކަތެއް ކެރިތިބެގެން ކުރަމުން ގެންދާނަން. މާލޭގެ މަގުތަކަށް ވަގުތީގޮތުން ހުރަސްއަޅާ ބައަކު އުޅުނު ކަމުގައިވީނަމަވެސް، އަޅުގަނޑުމެން ހަމަ ކެތްތެރިކަމާއެކީގައި އެކަންވެސް ތަޙައްމަލް ކުރާނަން.”

ރައީސް ވިދާޅުވީ އަޅުގަނޑުމެންގެ ޤައުމުގެ ޙަޤީޤަތް އޮޅުވާލުމަށްޓަކައި ބައަކު ކިތަންމެ މަސައްކަތެއް ކުރިނަމަވެސް، އެކަން ކާމިޔާބުނުވާނެ ކަމަށެވެ. އަދި އެފަދަ މަސައްކަތްތައް ކާމިޔާބު ނުކުރެވޭނެ ކަމުގެ ހެކި ދައްކަވަމުން ރައީސް ވިދާޅުވީ “އެކަމާ ދޭތެރޭގައި ޝައްކުކުރާ މީހަކު ހުރީވިއްޔާ، ހުރައަށްވެސް ޒިޔާރަތެއް ކޮށްލުން އަޅުގަނޑަށް ހީވަނީ ރަނގަޅުވާނެހެން.” ކަމަށެވެ.

ރައީސް ވިދާޅުވީ ބައަކު ކޮންމެ ގޮތަކަށް މަސައްކަތް ކުރިނަމަވެސް ﷲ އިރާދަފުޅާއިއެކު އެމަނިކުފާނު ހަވާލުވެވަޑައިގެން ހުންނެވި މަސްއޫލިއްޔަތު ބަރާބަރަށް އަދާކުރައްވަމުން ގެންދަވާނެ ކަމަށާއި ރައްޔިތުންނަށް ދައުލަތުގެ ފަރާތުން ދޭންޖެހޭ ހުރިހާ އެހީތެރިކަމަކާއި ރައްކާތެރިކަމެއް ސަރުކާރުގ ފަރާތުން ދެމުން ގެންދާނެ ކަމަށެވެ.

“މިކަމުގައި ދައުލަތުގެ ހުރިހާ މުއައްސަސާތަކުންވެސް ދަނީ މަސައްކަތް ކުރަމުން. އެކަމުގައި ސަލާމަތީގޮތުން އަޅަންޖެހޭ ފިޔަވަޅުތައް އެޅުމުގައި، އަޅުގަނޑުމެންގެ ފުލުހުންނާއި ސިފައިން ފަހަތަކަށް ނުޖެހޭނެ. އެބޭފުޅުން ތިއްބެވީ ކެރިގެން، ޤައުމުގެ ސަލާމަތް ރައްކާތެރިކޮށްދެއްވުމަށްޓަކައި. އެހެންވީމާ، އަޅުގަނޑު އެކަމަށް ފުލުހުންނަށާއި ސިފައިންނަށް އައްސަރިބަހާއި ސާބަސް ރައްދުކުރަން.”

ރައީސް ވިދާޅުވީ މިއަދުގެ ސަރުކާރުގެ ކެތްތެރިކަމަކީ، ސަރުކާރުގެެ ބަލިކަން ކަމުގައި އެއްވެސް ބައަކު ހީނުކުރުން އެދިވަޑައިގަންނަވާ ކަމަށާއި ހަރުކަށިވާންޖެހޭ ތަންތާނގައި ސަރުކާރުން ހަރުކަށިވެސްވނެ ކަމަށެވެ. “ފިޔަވަޅު އަޅަންޖެހޭ ތަންތާނގައި، ފިޔަވަޅުވެސް އަޅާނަން. އެހެން ނަމަވެސް، އަޅުގަނޑުމެންނަކީ ކެތްކުޑަވެގެން، ހަދާނެ ގޮތެއް ނޭނގިގެން އުޅޭ ބައެއް ނޫން. އަޅުގަނޑުމެން ޙިކްމަތްތެރިކަމާއެކީގައި ކުރަންޖެހޭ ކަންތައް ކުރަމުން ގެންދާނީ. އިރާދަކުރެއްވިއްޔާ، މިވޭތުވެދިޔަ 5 މަސް ދުވަސްވެސް ޞުލްޙަވެރިކަމާއެކުގައި އަޅުގަނޑުމެން މިހިސާބަށް އައީ. ﷲ އިރާދަކުރެއްވިއްޔާ، ދެން ކުރިއަށް އޮތް އެއް އަހަރުވެސް ހަމަ މިގޮތުގައި އަޅުގަނޑުމެން ހަމަ ރައްޔިތުންނާއެކީގައި މަސައްކަތް ކުރަމުން ގެންދާނަން.”

ކިޔުން ތެރިންގެ ހިޔާލު

 އަކުރު އެބައިން