ރީހެބް ވަމުންދާއިރު، އެކުދިންނަކީ އުފެއްދުންތެރި ބައަކަށް ހަދަން އެބަޖެހޭ: ނައިބް ރައީސް

01 ޖުލައި، 2012

މަސްތުވާތަކެތީގެ ވަބާގައި ޖެހިފައި ތިބި ކުދިން، ރީހެބް ވަމުންދާއިރު، އެކުދިންނަކީ އުފެއްދުންތެރި ބަޔަކަށް ހަދަން އެބަޖެހޭ ކަމަށާއި، ޙަޤީޤީ ފައިދާ ނުކުންނާނީ އޭރުން ކަމުގައި ނައިބު ރައީސް މުޙައްމަދު ވަޙީދުއްދީން ވިދާޅުވެއްޖެއެވެ.

ނައިބް ރައީސް މިހެން ވިދާޅުވީ، ހިންމަފުށީގައި ހުންނަ ޑްރަގް ރީހެބިލިޓޭޝަން ސެންޓަރުގެ 15 ވަނަ އަހަރީ ދުވަހުގެ މުނާސަބަތުގައި، ހުކުރު ވިލޭރޭ އެ ސެންޓަރުގައި ބޭއްވެވި އަހަރީ ޙަފްލާގައި ވާހަކަފުޅު ދައްކަވަމުންނެވެ.

ނައިބު ރައީސް ވިދާޅުވީ، މިކަމަކީ ސަރުކާރުގެ އެޖެންޑާގެ ހަމަ އެންމެ މަތީ މަގާމެއްދީފައި އޮތް އެއްކަންތައް ކަމުގައެވެ.

މިރޮނގުން ނައިބު ރައީސްގެ ވާހަކަފުޅު ކުރިއަށް ގެންދަވަމުން، އަޅުގަނޑުމެންގެ މުޖްތަމަޢުގެ ޒުވާނުންގެ ވަރަށްބޮޑު ބައެއް، މަސްތުވާތަކެތީގެ ވަބާގައި އެބައުޅޭކަން އަޅުގަނޑުމެން މިއަދު ޤަބޫލުކުރަން އެބަޖެހޭ ކަމަށް ވިދާޅުވިއެވެ. އަދި މިކަމުން ސަރުކާރަށާއި ރައްޔިތުންނަށް ލިބޭ އިޤްތިޞާދީ ގެއްލުން އަޅުގަނޑުމެންނަށް އަދިވެސް ފުރިހަމައަށް ހިސާބުކުރެވިފައި ނެތް ކަމަށްވިޔަސް، މިފަދަ ކަންކަމަށް ރައްޔިތުންގެ ފައިސާއިން ޚަރަދުކުރަން ޖެހުމަކީ، ޙަޤީޤަތުގައި އިޤްތިޞާދީ ގޮތުން ޤައުމަށް ލިބޭ ވަރަށްބޮޑު ގެއްލުމެއްކަން ނައިބު ރައީސް ފާހަގަކުރެއްވިއެވެ.

މަސްތުވާތަކެތީގެ ވަބާއިން ޤައުމު ސަލާމަތް ކުރުމުގައި، މުޅި މުޖްތަމަޢުގެވެސް، ވިޔަފާރިވެރިންގެވެސް، އަދި ތަނަވަސްކަން ލިބިފައިވާ ފަރާތްތަކުގެ ޒިންމާއެއްވެސް އެބައޮތްކަން ނައިބު ރައީސް ހަނދާންކޮށްދެއްވިއެވެ. އެހެންކަމުން، ޤައުމަށް ބަދަލުތައް ގެނެވޭނީ، މިދެންނެވި ހުރިހާ ފަރާތްތައް ޙިއްޞާކޮށްގެން، މިހުރިހާ ފަރާތްތައް ގުޅިގެން، ތަރައްޤީއާއި ކުރިއެރުމަށް މަސައްކަތް ކޮށްގެން ކަމުގައި އެމަނިކުފާނު ވިދާޅުވިއެވެ. އަދި މި ވަބާއިން ޤައުމު ސަލާމަތް ކުރުމަކީ، ވަކި ޕާޓީއެއްގެ މަސްއޫލިއްޔަތެއްވެސް ނޫން ކަމަށް ވިދާޅުވެ، ހުރިހާ ޕާޓީތައް ގުޅިގެން، ޤައުމުގެ މަޞްލަޙަތު ކުރިއަށް ނެރުމަށް ޕާޓީތަކަށް ނައިބު ރައީސް ގޮވާލެއްވިއެވެ.

ކިޔުން ތެރިންގެ ހިޔާލު

 އަކުރު އެބައިން