ކޯޓުގެ ހުރުމަތް ކަނޑައިގެން ކޮނޑޭ ކައުންސިލްގެ ކުރީގެ ރައީސް ހަތަރު މަހަށް ޖަލަށް ހުކުމްކޮށްފި

20 ޖޫން، 2012

ޝަހީދާ ސައީދު

ކޯޓުގެ ހުރުމަތް ކަނޑާލުމުގެ ކުށުގައި ކޮނޑޭ ކައުންސިލްގެ ކުރީގެ ރައީސް އަހުމަދު އައްބާސް ހަތަރު މަހަށް ޖަލަށްލުމަށް ކޮނޑޭ ކޯޓުން ހުކުމްކޮށްފި އެވެ.

ކޮނޑޭ މެޖިސްޓްރޭޓް ކޯޓުން މިދިޔަ ހޯމަދުވަހު ކުރި ހުކުމްގައި ބުނެފައިވަނީ  ދައުލަތުން އަހުމަދު އައްބާސްގެ މައްޗަށް ކޮށްފައިވާ  ޚިޔާނާތުގެ މައްސަލައަކާ ގުޅިގެން ކޮނޑޭ ކޯޓަށް ހާޒިރުވާން އަހުމަދު އައްބާސަށް ފޮނުވި ތިން އަމުރަށް ވެސް  ތަބާވެފައި ނުވާކަން ހެކީންގެ ހެކިބަހުން އެނގޭ ކަމަށެވެ.

ހުކުމުގައި ބުނެފައިވަނީ  ކޯޓް އަމުރާ އެއްގޮތަށް އައްބާސް ކޯޓަށް ހާޒިރުވެފައި ނުވަނީ ކޯޓްގެ ހުރުމަތް ކަނޑާލުމުގެ ގޮތުން ގަސްތުގައި ކަމަށް ކަނޑައަޅައި ކޯޓުގެ ހުރުމަތް ރައްކާތެރިކުރުމާއި ބެހޭ ގަވާއިދުގެ ތިން ވަނަ މާއްދާއަށް ރިއާޔަތްކޮށް ގާނޫނުލް އުގޫބާތުގެ 88 ވަނަ މާއްދާގެ ހ.ގެ ދަށުން އައްބާސް ހަތަރު މަހަށް ޖަލަށްލާން ހުކުމް ކުރީ ކަމަށެވެ.

އަދި ކައުންސިލް އިދާރާގެ އިސް މަގާމެއްގައި ހުރެ ކޯޓުގެ ހުރުމަތް ކަނޑާލުމަކީ ޝަރުއީ ދާއިރާއާމެދު ރައްޔިތުންގެ ހިތްތަކުގައި ނަފްރަތު އުފައްދަން އައްބާސް ކުރެއްވި ގާނޫނާއި ގަވާއިދާއި ޚިލާފު ކަމެއް ކަމަށް ވެސް ހުކުމުގައި ވެއެވެ.

ކޮނޑޭ ކައުންސިލުން ބުނީ އަހުމަދު އައްބާސްގެ މައްޗަށް މިއަހަރުގެ މާޗް މަހު 27 ގައި އިތުބާރު ނެތްކަމުގެ ވޯޓެއް ނަގާ ރަޢީސް ކަމުގެ މަގާމުން ދުރުކޮށްފައިވާ ކަމަށެވެ. އަދި މިހާރު އަހުމަދު އައްބާސް ހުރީ ގޭބަންދުގައި ކަމަށް ކައުންސިލުން ބުންޏެވެ.

އަހުމަދު އައްބާސް އަކީ އަމިއްލަ ގޮތުން ކައުންސިލަށް އިންތިޚާބު ވުމަށްފަހު، އެމްޑީޕީއާއި ގުޅި، އަދި އޭގެ ފަހުން މިހާރު ޖުމްހޫރީ ޕާޓީއަށް ސޮއިކޮށްފައިވާ މީހެކެވެ.

ކިޔުން ތެރިންގެ ހިޔާލު

 އަކުރު އެބައިން