އެމްޑީޕީގެ މުހިންމު އިންތިޚާބުތަކުގައި ވޯޓް ލެވޭނީ އޭޕްރީލް މަހު 12 ގެ ނިޔަލަށް ޕާޓީގައި ރަޖިސްޓްރީކުރި މީހުންނަށް- އެމްޑީޕީ

29 މޭ، 2012

ޝަހީދާ ސައީދު

މިއަހަރުގެ ޖޫންމަހު 16 ގައި ބާއްވާ އެމްޑީޕީގެ މުހިންމު އިންތިޚާބުތަކުގައި ވޯޓް ލެވޭނީ މިއަހަރުގެ އޭޕްރީލް މަހު 12 ގެ ކުރިން އެޕާޓީގެ ރަޖިސްޓްރީ ވެފައިވާ މެންބަރުންނަށް ކަމަށް އެޕާޓީން ބުނެފިއެވެ.

އެމްޑީޕީގެ ވެބްސައިޓްގައި ބުނެފައިވަނީ  ޖޫންމަހުގެ 16 ގައި ބާއްވާ އެމްޑީޕީގެ ރިޔާސީ ޕްރައިމަރީއާއި، ޗެއާޕާސަން ކަނޑައެޅުމުގެ އިންތިޚާބުގެ އިތުރުން ރިޔާސީ ޗެއަރޕާސަންގެ ނާއިބު އިދާރީ އާއި، ދާއިރާ ރައީސްއާއި،  ދާއިރާގެ ނައިބު ރައީސްގެ އިންތިހާބާއި، ދާއިރާގެ ސެކްރެޓަރީންނާއި، އަދި  ސެކްރެޓަރީންގެ ނާއިބުންގެ އިންތިހާބުގައި ވޯޓްލެވޭނީ މިއަހަރުގެ އޭޕްރީލް 12 ގައި ރަޖިސްޓްރީ ވެފައިވާ މީހުންނަށް ކަމަށެވެ.

އަދި  ޖޫން 16 ގައި އޮންނަ 7 އިންތިހާބުގައި 16 ކެންޑިޑޭޓަކު ވާދަކުރައްވާނެ ކަމަށާއި، މިއިންތިހާބު ތަކުގެ ވޯޓުލުން ރާއްޖޭގެ މީހުން ދިރިއުޅޭ ހުރިހާ ރަށެއްގައިވެސް ކުރިޔަށްދާނެކަމަށް އެމްޑީޕީން ވަނީ ބުނެފައެވެ.  އަދި ވޯޓުލުމަށް ޓަކައި 260 ވޯޓު ފޮށި ބަހައްޓާއިރު،  ވޯޓްފޮށި ތަކުގެ ކަންތައްތައް ބެލެހެއްޓުމަށް 1000 އަށް ވުރެ ގިނަ މީހުން އޮފިޝަލުންގެ ގޮތުގައި ހަރަކާތް ތެރިވާނެކަމަށް ވެސް އެމްޑީޕީން ބުންޏެވެ.

މި އިންތިހާބު ތަކުގައި ވޯޓުލެވޭނެ މެމްބަރުން އެމްޑީޕީގެ ރަސްމީ ވެބް ސައިޓުންނާއި ޕާޓީގެ މައި އިދާރާއިން މިހާރު ސާފުކުރެވޭނެ ކަމަށާއި، އަދި  އަދި މި އިންތިހާބު ތަކުގައި ވޯޓުލުމަށް ވީހާވެސް ގިނަ މެމްބަރުން ނިކުތުމަކީ ޕާޓީގެ ވަރަށް ބޮޑު އެދުމެއް ކަމަށް ވެސް އެމްޑީޕީން ބުނެއެވެ.

ކިޔުން ތެރިންގެ ހިޔާލު

 އަކުރު އެބައިން